viernes, 12 de enero de 2007

RAJEL BARNATAN: la entrega

La entrega



Kuando el Dio rompe su natura
Por kevrar yo la mia
Es ayi onde siento la entrega
Komo en dingún otro momento.
Siento la grandesa de Su presencia
Siento en mi Su mezma esencia
Siento ke la vida nunca da fin
Soltando kontinúa.
I en una dimesión leshana
I serkana al tiempo
Se desvelopan las demandas,
Se deshan fuera las duvdas
Se contemplan las alturas
Komo en la Tefilá
Kon el corazón roto.
Komo una súpita mirada del destino
Komo un nuevo avenir distinto
Komo un esfuenyo profondo
Komo el kamino rekto
Komo el djuisio djusto
Komo la flama del fuego
Komo el carinyo sinsero
Komo el abraso del ijo
La mano del marido
El paso del tiempo.
Kero en este único momento
Demandar al Dio
Un poko de sapiensa
I meténdome
En Su mezma esencia
Tomar presto inspiración
Para asertar
En la respuesta.



Rajel Barnartán